Ideahs

Catedrático de Historia da Arte con seis sexenios de investigación e Doutor con premio extraordinario na mesma disciplina pola Universidade de Santiago de Compostela, é un recoñecido especialista en temas de arquitectura e urbanismo, especialmente dos séculos XVII e XVIII e particularmente do Barroco e a Ilustración.

Estudou as cidades da Coruña, Santiago e Ferrol, a Torre de Hércules, o Arsenal Militar ferrolán, o Pórtico da Gloria, a fachada do Obradoiro e a Catedral de Santiago en distintos tempos históricos, así como o Barroco Galego na súa complexa diversidade e toda a cartografía histórica referida a Galicia na Idade Moderna, desde o século XVI ao XVIII e da que se conservan máis de 2000 planos de arquitectura de gran valor. É, ademais, autor de once libros, de máis de cen artigos de investigación, director de varias obras colectivas e sete teses doutorais, investigador principal de oito importantes proxectos de investigación concedidos polo Ministerio de Educación e Ciencia e a Xunta de Galicia e director da revista QUINTANA, do Departamento de Historia da arte, que está indexada en máis dunha decena de base de datos entre elas as moi selectivas SCOPUS e WOS. Durante trinta e catro anos exerceu tamén como profesor-titor no centro asociado da UNED da Coruña.

Exerceu así mesmo a crítica artística, a crónica sobre cidades, o comisariado en distintas exposicións e participado tamén na redacción de plans especiais urbanos e en proxectos de rehabilitación arquitectónica. Non faltan na súa traxectoria participacións en congresos nacionais e internacionais, en doutoramentos de calidade, en másteres e en cursos de carácter universitario. Foi durante máis de quince anos Coordinador do Grupo de Investigación HAAYDU (hoxe IDEAHS) da Universidade de Santiago e, durante doce, membro da Sección de Patrimonio do Consello da Cultura Galega na que se formalizaron varios expedientes que axudaron na consecución da condición de BIC para varios conxuntos e edificios galegos de gran relevo. Na actualidade pertence ao elenco de expertos da Casa da Fábrica da Catedral de Santiago, é membro da Comisión Asesora Municipal do Plan Especial de Protección e Reforma Interior dá Cidade Vella e Peixaría da Coruña, da Asociación de Historiadores da Arquitectura e do Urbanismo (AhAU), numerario do Instituto José Cornide de Estudos Coruñeses e Académico Correspondente da Real Academia de Belas Artes de San Fernando de Madrid.

En 2010 recibiu a Insignia de Ouro do Concello de Ferrol en recoñecemento ao seu labor de difusión e estudo da cidade e o seu arsenal militar. Debido á calidade da súa traxectoria académica en 2022 foi nomeado Profesor Emérito da Universidade de Santiago de Compostela (USC) tras corenta e tres anos de servizos docentes ininterrompidos.