Ideahs

PERMORIA proponse estudar a recepción crítica da arte pública en España e Portugal desde 1950: como se perciben as obras e que reaccións provocan ao longo do tempo. Neste proxecto, asumimos que as imaxes artísticas teñen un potencial performativo que escapa ao control dos seus creadores ou promotores, indo máis alá dos significados propostos e símbolos oficiais. 

Comezamos cunha reflexión crítica sobre as lecturas e interpretacións da arte pública, sinalando que a historia da arte case sempre salienta os procesos previos e as intencións simbólicas, mentres descoida a análise das reaccións e acontecementos comunitarios que falan da "axencia" da arte pública. Estase a levar a cabo un estudo de casos significativos no contexto da Península Ibérica desde 1950, co fin de comprender mellor as dinámicas sociais vinculadas á arte. O proxecto aborda a diversidade de modelos de arte pública e fai un seguimento das reaccións que provocan nos seus contextos, derivadas de consideracións estéticas, políticas ou simbólicas. Os estudos desenvolvidos en PERMORIA inclúen monumentos do século XIX, intervencións efémeras realizadas no contexto de bienais, activismo feminista ou ambiental, loitas de descolonización e memoriais relacionados con guerras e represión política.